കളമശേരിയിൽ ജ്വല്ലറി കവർച്ചാശ്രമം; മുളകുപൊടി സ്പ്രേ ചെയ്ത് ആക്രമണം, സഹോദരങ്ങൾ അറസ്റ്റിൽ

Kalamassery Jewellery Robbery Attempt: കളമശേരിയിൽ ജ്വല്ലറി കവർച്ചാശ്രമം; മുളകുപൊടി സ്പ്രേ ചെയ്ത് ആക്രമണം, സഹോദരങ്ങൾ അറസ്റ്റിൽ | Kalamassery Vartha

കളമശേരി: ഇടപ്പള്ളി ടോൾ ജംഗ്ഷന് സമീപമുള്ള ജ്വല്ലറിയിൽ മുളകുപൊടി സ്പ്രേ ചെയ്ത് സ്വർണം കവർന്നെടുക്കാൻ ശ്രമിച്ച സംഭവത്തിൽ രണ്ട് സഹോദരന്മാർ പൊലീസ് പിടിയിലായി. മലപ്പുറം എടക്കര സ്വദേശികളായ തോമസ് (30), മാത്യു (27) എന്നിവരാണ് അറസ്റ്റിലായത്. Kalamassery Jewellery Robbery Attempt

സംഭവം ഈ മാസം 19ന് ഉച്ചയ്ക്ക് 12.30ഓടെയാണ് നടന്നത്. സാറ ഗോൾഡ് ആൻഡ് ഡയമണ്ട്സ് എന്ന ജ്വല്ലറിയിലാണ് കവർച്ചാശ്രമം നടന്നത്. ജ്വല്ലറിയിലേക്ക് പെട്ടെന്ന് ഓടിക്കയറിയ തോമസ്, ഉടമ ബിന്ദുവിന്റെ മുഖത്ത് മുളകുപൊടി സ്പ്രേ ചെയ്തു.

തുടർന്ന് അലമാരയിൽ നിന്ന് ഡമ്മിയായി പ്രദർശിപ്പിച്ചിരുന്ന രണ്ട് മാലകൾ കൈക്കലാക്കി ഇയാൾ പുറത്തേക്ക് ഓടുകയായിരുന്നു. പുറത്തു സ്കൂട്ടറുമായി കാത്തുനിന്ന സഹോദരൻ മാത്യുവിനൊപ്പം രക്ഷപ്പെടാനായിരുന്നു ശ്രമം.

സ്കൂട്ടർ മുന്നോട്ട് നീക്കുന്നതിനിടെ മറ്റൊരു വാഹനവുമായി ഇടിച്ച് ചെറിയ തർക്കമുണ്ടായി. ഈ സമയത്ത് ജ്വല്ലറി ഉടമയുടെ നിലവിളിയും ഒച്ചപ്പാടും കേട്ട് സമീപവാസികൾ ഓടിയെത്തി തോമസിനെ പിടികൂടി പൊലീസിന് കൈമാറി.

എന്നാൽ മാത്യു സംഭവസ്ഥലത്ത് നിന്ന് ഓടി രക്ഷപ്പെടുകയായിരുന്നു. പിന്നീട് നടത്തിയ അന്വേഷണത്തിൽ, പുത്തൻകുരിശിൽ നിന്നു മോഷ്ടിച്ച സ്കൂട്ടറിലാണ് ഇരുവരും കവർച്ചയ്ക്ക് എത്തിയതെന്ന് പൊലീസ് കണ്ടെത്തി.

ജോലി അന്വേഷിച്ചാണ് ഇരുവരും എറണാകുളത്ത് എത്തിയതെന്നും ഇടപ്പള്ളി പ്രദേശത്ത് വാടകയ്ക്ക് താമസിക്കുകയായിരുന്നുവെന്നും പൊലീസ് അറിയിച്ചു. പിടിച്ചെടുത്ത മാലകൾ യഥാർത്ഥ സ്വർണമല്ലെന്ന കാര്യം ചോദ്യംചെയ്യലിനിടെയാണ് പ്രതികൾക്ക് വ്യക്തമായത്.

ഒരു ഗ്രാം തങ്കത്തിൽ പൊതിഞ്ഞ് നിർമ്മിച്ച, ഏകദേശം 8,000 രൂപ വിലവരുന്ന ഡമ്മി മാലകളാണ് കൈക്കലാക്കിയതെന്ന് പൊലീസ് വ്യക്തമാക്കി.

താൻ സംഭവത്തിൽ പങ്കില്ലെന്ന് മാത്യു വാദിച്ചെങ്കിലും, സിസിടിവി ദൃശ്യങ്ങൾ നിർണായക തെളിവായി. സ്ഥലത്ത് നിന്ന് മതിൽ ചാടി ഓടി രക്ഷപ്പെടുന്നതും ഹെൽമറ്റ് ഉപേക്ഷിച്ച് നടന്നുപോകുന്നതുമായ ദൃശ്യങ്ങൾ പൊലീസ് ശേഖരിച്ചു.

ഇൻസ്പെക്ടർ ടി. ദിലീഷ്, എസ്‌ഐ സനീഷ്, സിവിൽ പൊലീസ് ഓഫീസർമാരായ വിനു, അജ്മൽ എന്നിവരടങ്ങുന്ന സംഘമാണ് കേസ് അന്വേഷിക്കുന്നത്. പ്രതികൾക്കെതിരെ പിടിച്ചുപറി, ലഹരിമരുന്ന് കേസുകൾ ഉൾപ്പെടെ മുൻകേസുകൾ നിലവിലുണ്ടെന്ന് പൊലീസ് അറിയിച്ചു.

Please follow and like us: