Kalady Mattur Traffic Block പരിഹാരം: 1.5 കോടി അനുവദിച്ച് സ്ഥിരം സംവിധാനം

Kalady Mattur Traffic Block പരിഹാരം: 1.5 കോടി അനുവദിച്ച് സ്ഥിരം സംവിധാനം – Kalamassery Vartha

കാലടി: കാലടി–മറ്റൂർ ജംഗ്ഷനുകളിലെ രൂക്ഷമായ ഗതാഗതക്കുരുക്ക് പരിഹരിക്കാൻ സ്ഥിരം സംവിധാനങ്ങൾ ഒരുക്കുന്നതിനായി 1.5 കോടി രൂപ അനുവദിച്ചതായി റോജി എം. ജോൺ എംഎൽഎ അറിയിച്ചു.Kalady Mattur Traffic Block

കേരള റോഡ് സേഫ്റ്റി അതോറിറ്റിയുടെ ഫണ്ടിൽ നിന്നാണ് ഈ തുക അനുവദിച്ചിരിക്കുന്നത്. വർഷങ്ങളായി തുടരുന്ന ഗതാഗത പ്രശ്നത്തിന് ശാശ്വത പരിഹാരമാണ് ലക്ഷ്യമിടുന്നത്.

പാലച്ചുവട് മുതൽ കാലടി പാലത്തിന് ശേഷം താന്നിപ്പുഴ വരെയുള്ള ഭാഗത്ത് സ്ഥിരം മീഡിയനും അനുബന്ധ ട്രാഫിക് സൗകര്യങ്ങളും നിർമ്മിക്കുന്നതിനാണ് പദ്ധതി. ഇതിലൂടെ ഇരുവശങ്ങളിലേക്കുള്ള വാഹനഗതാഗതം കൂടുതൽ ക്രമീകരിക്കാനാകും.

കാലടിയിലെ ഗതാഗതക്കുരുക്ക് സംബന്ധിച്ച് ഗതാഗത മന്ത്രി കെ.ബി. ഗണേഷ് കുമാർ അധ്യക്ഷനായുള്ള യോഗം നേരത്തെ ചേർന്നിരുന്നു. എംഎൽഎ, പഞ്ചായത്ത് ജനപ്രതിനിധികൾ, കാലടി റെസിഡൻ്റ്സ് അസോസിയേഷൻ ഭാരവാഹികൾ, ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.

യോഗത്തെ തുടർന്ന് സ്പോൺസർഷിപ്പിലൂടെ താൽക്കാലിക മീഡിയനുകൾ സ്ഥാപിച്ചെങ്കിലും, വാഹനാപകടങ്ങളിൽ അവ തകർന്നുപോകുന്ന സാഹചര്യം ഉണ്ടായിരുന്നു. ഇതോടെയാണ് സ്ഥിരം സംവിധാനങ്ങളുടെ ആവശ്യം ശക്തമായത്.

പിന്നീട് എറണാകുളത്ത് മന്ത്രിയുടെ സാന്നിധ്യത്തിൽ ചേർന്ന തുടർയോഗത്തിലാണ് സ്ഥിരം മീഡിയൻ സ്ഥാപിക്കാൻ കുറഞ്ഞത് 1.5 കോടി രൂപ ആവശ്യമാണ് എന്ന് പി.ഡബ്ല്യു.ഡി ഉദ്യോഗസ്ഥർ വ്യക്തമാക്കിയത്.

ഇതിന്റെ അടിസ്ഥാനത്തിൽ വിശദമായ ഡി.പി.ആർ (Detailed Project Report) തയ്യാറാക്കി റോഡ് സേഫ്റ്റി അതോറിറ്റിക്ക് സമർപ്പിക്കുകയും ഭരണാനുമതി നൽകാൻ മന്ത്രി നിർദേശം നൽകുകയും ചെയ്തു.

ഇതിനിടെ കാലടിയിലെ പുതിയ സമാന്തര പാലത്തിന്റെ നിർമ്മാണം അവസാനഘട്ടത്തിലാണെന്നും, മെയ് അവസാനം പാലം തുറക്കാനാകുമെന്നാണ് പി.ഡബ്ല്യു.ഡി എൻജിനീയർമാർ അറിയിക്കുന്നത്.

ലഭ്യമായ തുക ഫലപ്രദമായി വിനിയോഗിച്ച് കൃത്യമായ ലെയിൻ ട്രാഫിക് സംവിധാനം നടപ്പിലാക്കിയാൽ, കാലടിയിലും മറ്റൂരിലും നിലവിലുള്ള ഗതാഗതക്കുരുക്ക് വലിയ തോതിൽ നിയന്ത്രിക്കാനാകുമെന്ന് റോജി എം. ജോൺ എംഎൽഎ പറഞ്ഞു.