മരുന്നില്ലാതെ ചികിത്സ;ആലുവ ഇഎസ്ഐ ഡിസ്‌പെൻസറിയിൽ രോഗികൾ ദുരിതത്തിൽ

Aluva ESI Dispensary Medicine Shortage | ഗുരുതര അവസ്ഥ: ആലുവ ഇഎസ്ഐ ഡിസ്‌പെൻസറിയിൽ മരുന്ന് ക്ഷാമം രൂക്ഷം – Kalamassery Vartha

ആലുവ:“മരുന്നിന് പോലും മരുന്നില്ല” എന്ന അവസ്ഥയിലേക്കാണ് ആലുവ ഇഎസ്ഐ ഡിസ്‌പെൻസറിയിലെ സാഹചര്യം എത്തിയത്. പ്രഷർ, ഷുഗർ, കൊളസ്ട്രോൾ തുടങ്ങിയ ജീവിതശൈലി രോഗങ്ങൾക്ക് പോലും ഒരു മാസത്തിലധികമായി മരുന്ന് ലഭിക്കുന്നില്ല എന്നതാണ് രോഗികളും തൊഴിലാളികളും ഉയർത്തുന്ന പ്രധാന പരാതി.Aluva ESI Dispensary Medicine Shortage

ജില്ലയിലെ പ്രധാനപ്പെട്ട ഇഎസ്ഐ ഡിസ്‌പെൻസറികളിലൊന്നായ ആലുവ കേന്ദ്രത്തെ ആശ്രയിച്ച് നൂറുകണക്കിന് തൊഴിലാളികളും കുടുംബങ്ങളും ചികിത്സ തേടിയെത്തുന്നുണ്ട്. എന്നാൽ സ്ഥിരമായി ആവശ്യമായ മരുന്നുകളുടെ ലഭ്യത ഇല്ലാതായത് രോഗികളെ ഗുരുതര പ്രതിസന്ധിയിലാക്കി.

വ്യവസായ കേന്ദ്രമായിരുന്ന ആലുവ; ആശ്രിതർ ഇപ്പോഴും അനവധി

ഒരുകാലത്ത് അശോക്, ജിടിഎൻ കാത്തായ് തുടങ്ങിയ വൻ നൂൽക്കമ്പനികൾ പ്രവർത്തിച്ചിരുന്ന ആലുവയിൽ, മികച്ച സൗകര്യങ്ങളോടെയാണ് ഇഎസ്ഐ ഡിസ്‌പെൻസറി രൂപകൽപ്പന ചെയ്തത്. കാലക്രമത്തിൽ പല വൻകിട സ്ഥാപനങ്ങളും അടച്ചുപൂട്ടിയെങ്കിലും, നിരവധി ചെറുകിട യൂണിറ്റുകൾ ഇപ്പോഴും പ്രവർത്തിക്കുന്നതിനാൽ ഇഎസ്ഐയെ ആശ്രയിക്കുന്ന തൊഴിലാളികളുടെ എണ്ണത്തിൽ വലിയ കുറവൊന്നും ഉണ്ടായിട്ടില്ല.

ഫോർട്ട് കൊച്ചിയിൽ നിന്ന് മരുന്നെത്താൻ രണ്ടാഴ്ച താമസം

തിരുവനന്തപുരം ഇഎസ്ഐ ഡിപ്പോയിൽ നിന്ന് മരുന്നുകൾ ഫോർട്ട് കൊച്ചിയിലെ സബ് ഡിപ്പോയിലേക്ക് എത്തിയതായി അധികൃതർ വ്യക്തമാക്കുന്നു. എന്നാൽ അവിടെ നിന്ന് ആലുവ ഡിസ്‌പെൻസറിയിലേക്ക് മരുന്ന് എത്തുന്നതിലാണ് ഇപ്പോൾ വൈകുന്നത്.
ഒന്നോ രണ്ടോ ആഴ്ചയ്ക്കുള്ളിൽ പ്രശ്നം പരിഹരിക്കപ്പെടുമെന്ന പ്രതീക്ഷ മാത്രമാണ് അധികൃതർ നൽകുന്നത്.

ഉത്തരവാദിത്വ ഭീതിയിൽ കുറവ് ഓർഡർ; മരുന്ന് ക്ഷാമത്തിന് കാരണമാകുന്നു

ഇഎസ്ഐ ഡിസ്‌പെൻസറിയിൽ സാധാരണയായി ഒരു വർഷത്തേക്കുള്ള മരുന്ന് മുൻകൂർ ഓർഡർ ചെയ്യണം. കാലാവധി കഴിഞ്ഞിട്ടും മരുന്ന് ബാക്കി നിന്നാൽ, ഓർഡർ നൽകിയ ഉദ്യോഗസ്ഥർ വിശദീകരണം നൽകേണ്ടിവരും.
ഈ ഉത്തരവാദിത്വ ഭീതിയിലാണ്, മരുന്ന് ക്ഷാമം ഉണ്ടായാലും കുറവ് ഓർഡർ നൽകുന്ന പ്രവണത ജീവനക്കാരിൽ നിലനിൽക്കുന്നതെന്ന് ബന്ധപ്പെട്ടവർ പറയുന്നു.

മൂന്ന് വർഷത്തിന് ശേഷം തുറന്ന ലാബ്; അതും രണ്ട് ആഴ്ച മുൻപ് മാത്രം

ആലുവ ഇഎസ്ഐ ഡിസ്‌പെൻസറിയിലെ ലാബ് മൂന്ന് വർഷത്തിലധികം അടച്ചിട്ട ശേഷമാണ് രണ്ട് ആഴ്ച മുൻപ് വീണ്ടും പ്രവർത്തനം ആരംഭിച്ചത്.
ഏകദേശം നാല് ലക്ഷം രൂപ ചെലവിട്ടാൽ മതിയായിരുന്ന രക്തപരിശോധന സംവിധാനം പുനഃസ്ഥാപിക്കാൻ മൂന്ന് വർഷം കാത്തിരിക്കേണ്ടിവന്നത് അധികൃതരുടെ അനാസ്ഥയെന്ന വിമർശനങ്ങൾക്ക് ഇടയാക്കി.Aluva ESI Dispensary Medicine Shortage

ഇൻഷുറൻസ് മെഡിക്കൽ സർവീസസ് ഡയറക്ടർ (ഇൻചാർജ്) ഡോ. വി.എ. സിനി പ്രിയദർശിനി കഴിഞ്ഞ 24-നാണ് ലാബ് ഉദ്ഘാടനം ചെയ്തത്.

മരുന്ന് ഉടൻ ലഭ്യമാക്കണം; അല്ലെങ്കിൽ ശക്തമായ പ്രക്ഷോഭം

ഇഎസ്ഐ ഡിസ്‌പെൻസറിയിൽ ആവശ്യമായ എല്ലാ മരുന്നുകളും അടിയന്തരമായി ലഭ്യമാക്കണം എന്ന ആവശ്യവുമായി തൊഴിലാളി സംഘടനകൾ രംഗത്തെത്തി.
ഇത് പരിഹരിച്ചില്ലെങ്കിൽ, തൊഴിലാളികളുടെ നേതൃത്വത്തിൽ ശക്തമായ പ്രക്ഷോഭം ആരംഭിക്കുമെന്ന് ഐ.എൻ.ടി.യു.സി ദേശിയ സമിതി അംഗം വി.പി. ജോർജ് മുന്നറിയിപ്പ് നൽകി.

സമുദ്രത്തിന്റെ അത്ഭുതലോകം കൊച്ചിയിൽ