Pukkattupady Fire Accident
Pukkattupady Fire Accident 2026| പുക്കാട്ടുപടി വയറോപ്സ് കവലയിൽ ശ്രീഗോകുലം സിനിമ ഗോഡൗണിൽ ഗുരുതര തീപിടിത്തം; ലക്ഷങ്ങളുടെ നഷ്ടം – Kalamassery Vartha
പുക്കാട്ടുപടി വയറോപ്സ് കവലയിലെ ശ്രീഗോകുലം ഗ്രൂപ്പിന് കീഴിൽ പ്രവർത്തിക്കുന്ന സിനിമ ചിത്രീകരണശാല ഗോഡൗണിൽ വൻ തീപിടിത്തം. വ്യാഴാഴ്ച രാവിലെ 11.30ഓടെയാണ് തീപിടിത്തമുണ്ടായത്. സംഭവത്തിൽ ലക്ഷക്കണക്കിന് രൂപയുടെ നാശനഷ്ടമുണ്ടായതായി പ്രാഥമിക വിലയിരുത്തൽ.Pukkattupady Fire Accident
സിനിമ ചിത്രീകരണങ്ങൾക്ക് ആവശ്യമായ ഡമ്മി ഉപകരണങ്ങൾ, സെറ്റ് സാമഗ്രികൾ, മറ്റ് സാങ്കേതിക ഉപകരണങ്ങൾ എന്നിവ സൂക്ഷിച്ചിരുന്ന ഏകദേശം 500 ചതുരശ്ര അടി വിസ്തീർണമുള്ള ഗോഡൗണാണ് തീയിൽ അകപ്പെട്ടത്. തീ പടർന്നതോടെ ഗോഡൗണിനുള്ളിലെ ഭൂരിഭാഗം സാമഗ്രികളും പൂർണമായും കത്തിനശിച്ചു.
ആലുവ അസി. സ്റ്റേഷൻ ഓഫീസർ വിനോജിന്റെ നേതൃത്വത്തിൽ ആലുവ, പെരുമ്പാവൂർ, പട്ടിമറ്റം എന്നിവിടങ്ങളിലെ അഗ്നിരക്ഷാസേനാ യൂണിറ്റുകൾ സ്ഥലത്തെത്തി. മണിക്കൂറുകളോളം നീണ്ട കഠിന പരിശ്രമത്തിനൊടുവിലാണ് തീ പൂർണമായും നിയന്ത്രണവിധേയമാക്കാനായത്.
തീപിടിത്തത്തിന് ഷോർട്ട് സർക്യൂട്ടാണ് കാരണമെന്നാണ് അഗ്നിരക്ഷാസേനയുടെ പ്രാഥമിക നിഗമനം. സംഭവത്തിൽ ആളപായമില്ലെന്നത് ആശ്വാസകരമായ കാര്യമാണ്.
മുൻപ് പ്രവർത്തനം നിലച്ചിരുന്ന വയറോപ്സ് കമ്പനി, ശ്രീഗോകുലം ഗ്രൂപ്പ് ഏറ്റെടുത്ത് സിനിമ ചിത്രീകരണ കേന്ദ്രമായാണ് മാറ്റിയിരുന്നത്. സംഭവത്തെ തുടർന്ന് പ്രദേശത്ത് താൽക്കാലിക ആശങ്ക നിലനിന്നുവെങ്കിലും നിലവിൽ സ്ഥിതി നിയന്ത്രണത്തിലാണ്.
അഗ്നിരക്ഷാസേനയും മറ്റ് ബന്ധപ്പെട്ട വകുപ്പുകളും വിശദമായ അന്വേഷണം ആരംഭിച്ചിട്ടുണ്ട്.
