കാക്കനാട് ജില്ലാ ജയിലിന് മുകളിൽ രാത്രി ഡ്രോൺ: സുരക്ഷാ ഏജൻസികൾക്ക് കടുത്ത ആശങ്ക

Drone Over Kakkanad District Jail: കാക്കനാട് ജില്ലാ ജയിലിന് മുകളിൽ ഡ്രോൺ; സുരക്ഷാഭീഷണി | Kalamassery Vartha

കൊച്ചി:സുരക്ഷാമേഖലയായി പ്രഖ്യാപിച്ച കാക്കനാട് ജില്ലാ ജയിലിന് മുകളിൽ രാത്രി ഡ്രോൺ പറത്തിയ സംഭവം സംസ്ഥാനത്ത് ഗൗരവമായ സുരക്ഷാ ആശങ്കകൾക്ക് കാരണമായി. സംഭവത്തിൽ പോലീസും സംസ്ഥാന ഇന്റലിജൻസ് വിഭാഗവും സംയുക്ത അന്വേഷണം ആരംഭിച്ചു.Drone Over Kakkanad District Jail

ഇന്നലെ രാത്രി 7.50ഓടെ ആണ് കാക്കനാട് ജില്ലാ ജയിലിനും അതിനോട് ചേർന്നുള്ള വനിതാ ജയിൽ, ബോസ്റ്റൽ സ്കൂൾ എന്നിവയ്ക്ക് മുകളിലൂടെ ഡ്രോൺ പ്രത്യക്ഷപ്പെട്ടത്. ഏകദേശം നാലു മിനിറ്റോളം ഡ്രോൺ ജയിലും പരിസര പ്രദേശങ്ങളും നിരീക്ഷിച്ചതായാണ് പ്രാഥമിക വിവരം.

ജയിലിന്റെ വടക്ക്-കിഴക്ക് ഭാഗത്ത് നിന്ന് എത്തിയ ഡ്രോൺ, പടിഞ്ഞാറ് ഭാഗത്തുള്ള വനിതാ ബ്ലോക്കും ബോസ്റ്റൽ സ്കൂളും മുകളിലായി കുറച്ചു സമയം നിലയുറപ്പിച്ചു. ഈ സമയത്ത് നീലയും ചുവപ്പും നിറങ്ങളിലുള്ള ലൈറ്റുകൾ മിന്നിയതായി ജയിൽ അധികൃതർ സ്ഥിരീകരിച്ചു.

തുടർന്ന് ഡ്രോൺ, ജയിൽ വളപ്പിന് പുറത്തുള്ള നിർമാണത്തിലിരിക്കുന്ന കെട്ടിട സമുച്ചയ ഭാഗത്തേക്ക് നീങ്ങുകയും പിന്നീട് അപ്രത്യക്ഷമാകുകയും ചെയ്തു.

ഡ്രോൺ ശ്രദ്ധയിൽപ്പെട്ട ഉടൻ ജയിൽ ഉദ്യോഗസ്ഥർ സൂപ്രണ്ടിനെ വിവരം അറിയിച്ചു. തുടർന്ന് ഇൻഫോപാർക്ക് പൊലീസ് സ്ഥലത്തെത്തി, എന്നാൽ അതിനകം ഡ്രോൺ കാഴ്ചയിൽ നിന്ന് മറഞ്ഞിരുന്നു.

കാക്കനാട് ജില്ലാ ജയിലിൽ എൻ.ഐ.എ കേസുകളിലെ പ്രതികൾ ഉൾപ്പെടെ നിരവധി ഉയർന്ന സുരക്ഷാ തടവുകാർ പാർപ്പിച്ചിട്ടുള്ളതിനാൽ, സംഭവത്തെ വളരെ ഗൗരവത്തോടെയാണ് സുരക്ഷാ ഏജൻസികൾ വിലയിരുത്തുന്നത്.

ഡ്രോണിലൂടെ ലഹരിവസ്തുക്കൾ, മൊബൈൽ ഫോണുകൾ, ആയുധങ്ങൾ എന്നിവ ജയിലിലേക്ക് എത്തിക്കാൻ ശ്രമം ഉണ്ടായിരിക്കാമെന്ന സംശയവും ശക്തമാണ്. ഇതേ തുടർന്നാണ് സിസിടിവി ദൃശ്യങ്ങൾ, സിഗ്നൽ ട്രാക്കിംഗ്, സമീപ പ്രദേശങ്ങളിലെ പരിശോധന എന്നിവ വ്യാപകമാക്കിയത്.

സംഭവം സംസ്ഥാനതല സുരക്ഷാ വീഴ്ചയാണോ എന്നതടക്കമുള്ള കാര്യങ്ങൾ പരിശോധിച്ചുവരികയാണെന്നും, കൂടുതൽ വിവരങ്ങൾ ശേഖരിച്ച ശേഷം നടപടി ശക്തമാക്കുമെന്നും പൊലീസ് വ്യക്തമാക്കി.

---

മരുന്നില്ലാതെ ചികിത്സ;ആലുവ ഇഎസ്ഐ ഡിസ്‌പെൻസറിയിൽ രോഗികൾ ദുരിതത്തിൽ