No Entry Anti Drug Campaign
No Entry Anti Drug Campaign: ഹൈബി ഈഡന്റെ ലഹരി വിരുദ്ധ നീക്കത്തിന് തൃക്കാക്കരയിൽ തുടക്കം | Kalamassery Vartha
കാക്കനാട്: എറണാകുളം പാർലമെന്റ് മണ്ഡലത്തിൽ ലഹരിവിരുദ്ധ പ്രവർത്തനങ്ങൾക്ക് ശക്തി നൽകുന്ന “No Entry Anti Drug Campaign”-ന് തൃക്കാക്കര നഗരസഭയിൽ ഔദ്യോഗിക തുടക്കം. ഹൈബി ഈഡൻ എംപി നേതൃത്വം നൽകുന്ന ഈ സമഗ്ര കാമ്പയിൻ, സമൂഹത്തെ ലഹരിയുടെ പിടിയിൽ നിന്ന് മോചിപ്പിക്കുകയെന്ന ലക്ഷ്യത്തോടെ വിവിധ ഘട്ടങ്ങളിലായി നടപ്പാക്കും.
തൃക്കാക്കര മുനിസിപ്പൽ കമ്മ്യൂണിറ്റി ഹാളിൽ സംഘടിപ്പിച്ച സമ്മേളനം ഹൈബി ഈഡൻ എംപി ഉദ്ഘാടനം ചെയ്തു. ലഹരിയുടെ ഭീഷണി സമൂഹത്തിൽ സൃഷ്ടിക്കുന്ന ഗുരുതര പ്രത്യാഘാതങ്ങൾ തിരിച്ചറിയുകയും, യുവതലമുറയെ സംരക്ഷിക്കുകയും ചെയ്യേണ്ടത് അനിവാര്യമാണെന്ന് അദ്ദേഹം പറഞ്ഞു.No Entry Anti Drug Campaign
തൃക്കാക്കര നഗരസഭ ചെയർമാൻ റാഷിദ് ഉള്ളംപള്ളി അധ്യക്ഷത വഹിച്ചു. ചലച്ചിത്ര നടൻ അജു വർഗീസ് മുഖ്യാതിഥിയായി പങ്കെടുത്തു. ലഹരി സമൂഹത്തിലുണ്ടാക്കുന്ന നാശം തിരിച്ചറിയേണ്ട നിർണായക കാലഘട്ടത്തിലൂടെയാണ് നാം കടന്നുപോകുന്നതെന്ന് അജു വർഗീസ് അഭിപ്രായപ്പെട്ടു.
Fourth Wave Foundation ആണ് കാമ്പയിന്റെ പ്രവർത്തനങ്ങൾ ഏകോപിപ്പിക്കുന്നത്. JAIN Deemed to be University, Kochi, Future Kerala Mission എന്നിവയുടെ പിന്തുണയോടെയാണ് പദ്ധതി നടപ്പാക്കുന്നത്.
എറണാകുളം ലോക്സഭാ മണ്ഡലത്തിലെ കൊച്ചി കോർപ്പറേഷനു പുറമേ, ആറു മുനിസിപ്പാലിറ്റികളിലും 24 പഞ്ചായത്തുകളിലുമായി “Safe Village” എന്ന പേരിൽ ലഹരി വിമുക്ത ഗ്രാമപദ്ധതി നടപ്പാക്കുമെന്ന് ഹൈബി ഈഡൻ എംപി അറിയിച്ചു. സമൂഹ അടിസ്ഥാനത്തിലുള്ള ബോധവത്കരണ പരിപാടികളും ഇടപെടലുകളും കാമ്പയിന്റെ ഭാഗമാകും.
സമ്മേളനത്തിൽ JAIN Deemed to be University പ്രൊ വൈസ് ചാൻസലർ ഡോ. ജെ. ലത, Fourth Wave Foundation ഡയറക്ടർ സി. സി. ജോസഫ്, തൃക്കാക്കര നഗരസഭ ഡെപ്യൂട്ടി ചെയർപേഴ്സൺ ഷെറീന ഷുക്കൂർ തുടങ്ങിയവർ പങ്കെടുത്തു.
ലഹരിവിരുദ്ധ പ്രവർത്തനങ്ങൾ ജനകീയ പ്രസ്ഥാനമായി മാറണമെന്നും, കുടുംബം മുതൽ വിദ്യാഭ്യാസ സ്ഥാപനങ്ങൾ വരെ ഒരുമിച്ച് പ്രവർത്തിക്കണമെന്നും പങ്കെടുത്തവർ അഭിപ്രായപ്പെട്ടു.
